‘Eihar jagoten’ sortu da Areitioren umearen “beharrizanei” erantzuteko

Eihar Jagoten plataforma sortu dute Alaitz Areitio euskal preso iurretarraren jaioberriaren “beharrizanei” laguntzeko. Aurkezpenean 100 bat lagun batu dira.

Gurasoak kartzelan dituenez, Eiharren “eskubide politiko eta moral guztiak errespetatuak” izan daitezen lan egitea izango du zeregina taldeak, “zaintza, gaixoaldi eta oro har suertatu daitezken arazo denei erantzun egokia emateko”. Hilean behin batuko dira, eta “elkartasuna” eta “laguntza ekonomikoa” eskaintzea da helburua.

Besteren artean, ekitaldi sorta eratu dute zapaturako, Bizkaiko bertsolarien eta Iurretako Gazte Asanbladaren laguntzarekin. Mendi martxa abiatuko da Goiuria ikastolatik 10:00etan, eta, 19:00etan bertso saioa egingo dute eskoletan: Unai Iturriaga, Igor Elortza, Iratxe Ibarra, Onintza Enbeita, Etxaun Lekue eta Xabi Payak jardungo dute; gai jartzaile, berriz, Maite Berriozabalek. Parte hartzeko dei zabala egin dute.

Fleuryko (Paris) kartzelan dago 2007ko ekainaren 7tik Areitio. Atxilotu zutenean lau asteko zegoen haurdun (umearen aita, Igor Igartua, Areitiorekin batera atxilotu zuten) eta umea hilaren 5ean jaio zen, “ordudanik etxekoen bisitak besterik ez dituzte izan; euren arteko bisitak ere galarazi dizkie”.