Berrio-Otxoaren berriztatzeko lanekin amaitu gura dute

Berrio-Otxoa kalearen azken zatiaren — Txantxibiri kalea deritzona— berriztatze lanak hasi gura dituzte udal arduradunek eta horretarako exekuzio egitasmorako 60.000 euro erabiliko dituzte. 2007ko altxortegiko geldikinetik bideratuko dute diru hori.

Bertotik bideratuko dute dirua baita beste hainbat inbertsiori aurre egiteko ere: besteak beste, ibilgailuak sartzea galarazteko zutoinak jarriko dituzte eta Hiri-ordenazioko Plangintza Orokorrerako lanak kontratatuko dituzte. Denera, 392.000 euro inguru bideratuko dituzte altxortegiko geldikinetik. Udalbatzarrak aho batez hartu du erabakia.

Txantxibiri lez ezagutzen den Berrio-Otxoa kalearen azken zatiaren berriztatze lanak aurten jarri gura dituzte martxan eta horretarako albait arinen hasi gura dute lanen adjudikaziorako tramitazioa: “Berrio-Otxoa kalean aurretik egindako hirigintza lanak baino konplexuagoak izango dira honek; izan ere, zorua altxatuko da eta hodi guztiak aldatuko dira. Saneamendua, argiteria, telefonia… zerbitzu guztiak berriztatuko dira”. Halaxe azaldu du Niko Moreno alkateak. Berrio-Otxoak San Joan kalearekin bat egiten duen lekutik Kurutziaga ingurura arte berriztatuko da kalea; Otsa kalea ere batzen dute lanok.

Aitatu dugun moduan Hiri-ordenazioko Plangintza Orokorrerako lanak kontratatzeko 110.000 euro bideratuko ditu Udalak eta Alde Zaharreko hainbat puntutan zutoinak jarriko dituzte ibilgailuak pasatzea galarazi guran. Erreka, San Pio, Musiko Arriola eta Urarka kaleetan jarriko dira, Abadetxera doan aldapan ez eze, eta horretarako 75.000 euro erabiliko dituzte.
Horrezaz gainera, kale-garbitzeko makina berria erostera bideratuko dituzte 134.000 euro eta kiroldegian inbertsioak egitera 16.400 euro. Bestalde, udal biltegi moduan erabiltzeko Jolasleku alokatuko du Udalak (6.200 euro urtean).