ATLETISMOA
Peio Agirrebeitiak eta Alizia Romerok irabazi dute Urkiolako igoera
Abadiño - 2008ko ekainaren 23a, 14:28
Durangarrak biak eta Bidezabal atletismo taldekoak. Peiok eta Aliziak maila bikainaz irabazi zuten atzo Bidezabalek berak antolatzen duen Urkiolako igoera. Ezaugarri hauek dituzten proben artean Bizkaiko zailenetarikoa da hau eta hezetasunak eta lokatzak are eta gehiago zaildu zuten proba. Gainera, ia bostehun metroko desnibela dauka ibilaldi honek azken hiru kilometroetan.
Mohamed El Gouarrahren bajak asko erraztu zien garaipena durangarrei. Agirrebeitia hogeita hamazortzi minutu eta hogeita zazpi segundoko denborarekin iritsi zen, Jose Lagardera bigarren sailkatua baino minutu bat lehenago, alegia. Durangarra bakarrik aritu zen Abadiñotik Urkiolako santutegira dauden 7,6 kilometroetan. Hirugarren postuan Felicisimo Solanas sailkatu zen hogeita hemeretzi minutu eta berrogeita hamaika segundo eginda.
Bestalde, emakumezkoei dagokienez, Alizia Romero izan zen beste behin ere onena. Berrogeita sei minutu eta hogeita zazpi segundo behar izan zituen durangarrak ibilbidea betetzeko. Inma Ruiz beteranoa baino gehiago izan zen. Hala ere, Ruiz ez zen gaizki ibili, berrogeita zortzi minutu eta hamahiru segundu egin baitzituen, bigarren postuan sailkatuz. Hirugarren postua Marta Henaresentzat izan zen eta honek ordubete eta sei minutu behar izan zituen.
Agirrbeitiak eta Romerok batera lortzen duten bigarren garaipena da, izan ere, joan den igandean Forum Sport –Kosta Trail probako hirugarren edizioa irabazi zuten.
