Errepikatzeko modukoa

Zazpi margolarik aurkeztu dituzte herrian antolatutako lehenengo Aire Libreko Pintura Lehiaketan euren lanak; horrietariko bi izurtzarrak izan dira, gainera. Arte Ederretan lizentziatuak diren hiru lagunek osatutako epaimahaiak, Alexander Reteri emon dio Pintura Lehiaketako 600 euroko lehenengo saria, eta Bruno Ibañez eta Aratz Azpiri izan dira 400 euroko bigarrena eta 200 euroko hirugarrena jaso dituztenak.



Margolariek agertutako askotariko teknikekin eta lehiaketan aurkeztutako lanen kalitatearekin oso pozik geratu dira antolatzaileak; olioagaz, akuarelagaz eta arkatzagaz egindako lanak aurkeztu dituzte, besteak beste. Bero itzela egin zuen arren, giro polita egon zela herrian nabarmendu digute antolatzaileek, eta lehenengo edizioa izateko parte-hartzaile kopurua handia izan dela ere bai. Horregatik nabarmendu gura izan dute antolatzaileek, datorren urtean ere antolatuko dutela; deialdi zabalagoa egin eta aurten izan ez den sari lokala ere eskainiko ei dute.
Hasiera batean halan aurreikusita ez zeukien arren, lehiaketara aurkeztu eta herrian osatutako lanak hamabost egunez ikusgai izango dira Udaletxean.