Oinezkoentzako lekua irabaziko dute Bixente Kapanaga zaharberrituta

Eskaintza ekonomikoak jasotzeko epea hasita, astebete inguruan Bixente Kapanagako zaharberritze-lanak emateko tramitazioa hasiko du Udalak. Lanak abuztuan hastea aurreikusi dute, 1,54 milioi inguruko inbertsioa eskatuz, eta, sei eta bederatzi hile bitartean egitekoak dira.

Oinezkoentzako lekua irabaziko dute lanokin; izan ere, Askondon hasita lau metroko espaloiak jarriko dituzte ia Bixente Kapanaga osoan. Horretarako, dauden 30 bat aparkalekuak desagertu egingo dira.

“Osorik eraberrituko dugu”, Iñaki Totorikaguena alkatearen berbetan. Udalaz gaineko zerbitzuak —argia, gasa, telefonia…—  eta ur-hornidurarako hodi guztiak berriztuko dituzte, saneamendu sarea barne. Hiri-altzariak ere berriztatuko dituzte —paperontziak, jarlekuak, argiteria…— eta arbolak ipini.

Zubiaurren lez, lurpeko zaborrontziak jarriko dituzte Amilburu eta Dantzarin; zabor organikorako hiru, eta, paper eta kartoientzat, beirarentzat eta ontzientzat bana. Galtzada eta espaloia maila berean jarriko dituzte eta bost zebra-bide jarriko dituzte, legediak dioena betez, ikusmen urritukoentzat egokituta. Aitatu dezagun informazioa emateko Led pantaila ere jarriko dela Askondon.

Jaiak bete-betean

Bete-betean harrapatuko dituzte Sanmigelak: “Eragozpenak sortuko dira eta zelan bideratu aztertu beharko dugu lanak eroango dituen enpresarekin, baina, hasi beharrean gaude, urtea amaitzean zati handiena eginda izan eta  erakundeetako diru-laguntzak lortzeko”. Aparkalekuak kenduko direla-eta arazorik sortuko denik ez du uste alkateak: “Hor dago betetzen ez den Ibarretxeko aparkalekua (125 leku) edo Tellitukoa (75 leku), eta Bidebarrietako 100 bat aparkalekuak; Padureta (200 leku) kontuan hartu gabe”.