Erdibidera iritsiko da asteburuan

Barikuan, uztailaren 11n, 22:30etik aurrera Argiñetan izango da Elorrioko Musikaireko hitzordua. Euskal musikaren erreferentzietako bat dugun musikaria izango da kontzertuan: Juan Carlos Perez. Orain hainbat urte Itoiz taldeko abeslari lez ezagun egin zen musikariaren emanaldia da. Itoitz desegin zutenetik kaleratu duen laugarren diskoa aurkeztuko du Juan Carlos Perezek Argiñetako gauean: Hiriko istorioak diskoko abestiak joko ditu. Jazza, bluesa eta bestelako estiloak uztartzen ditu hainbat  musikarirekin; Perez berak pianoaz, gitarraz eta ahotsaz arduratuko da, eta, Fernan Irazoki bateriaz, Gonzalo Tejada kontrabaxuaz, Andrzej Olejniczak saxoaz, Alberto Urretxo tronboiaz eta Ruben Salvador tronpetaz.

Pobre gara izeneko lan berriko kantak aurkeztera etorriko da, bestalde, Joseba Irazoki musikaria, Belardian taldearekin 70eko hamarkadako ukitua duten kantak jotzera; zapatuan, uztailaren 12an, 22:30ean San Josen.

Kale antzerkizaleen hitzordua, Italiako Teatrino Dei Piedi taldearekin izango da uztailaren 13an, 22:30ean, plazan. Antzerkiaren bitartez fantasia, erritmo eta kolorez beteriko une umoretsuak antzeztuko dituzte Musikairen.

Asteburu honetako ikuskizunekin helduko da hamargarren Musikaire erdibidera. Euskal Herrian sortutako musika eta Italiatik ekarritako kale antzerkia izango dira, goian aipatu lez, bariku, zapatu eta domeka honetarako Musikaireko proposamenak. Ondoren, uztaila amaitu arte, Brasil, Kuba eta Portugalgo musikariak izango dira Elorrioko gonbidatuetako batzuk. Izan ere, kalean eta doan izaten diren emanaldietan beste inguru batzuetako kulturak ikusgai ipintzen baititu eskualdean Musikairek.



Halaxe egin zuten argazkian ageri den iragan asteburuko parkingeko emanaldian ere: Kairoko Derbitxeak, Egiptoko herri-musika eta dantza sufi erakargarriak erakutsi zituzten Elorrion. Dantzarien mugimenduen abiadurak ikusleak gozarazi eta harritu zituen.