Zabortegiko lurretan kirol eta aisialdi gunea eraikiko dute

74.800 metro koadroko espazioan lau zonalde egokituko dituzte. Herri kirolen gunea proiektu honen erdigunean kokatuko da. Iparraldeko estiloko frontoi bi, bi paretetako beste frontoi bat, probalekua, bolatokia, trontzarako gunea eta beste hainbat kiroletan jarduteko lekua prestatuko dabe. Gaur egun belodromoa eta futbol zelaia dauden aldamenean, aparkalekuaz gainera, komunak eta biltegia eraikiko dituzte. Berdegunean oinezkoentzako ibilbidea egokituko dute bidea azkarrago egiteko bidezidorrekin. Nagusientzako ibilbidean, berriz, ariketa fisikoa egiteko makinak erabiltzeko aukera izango da. Ume eta gaztetxoek beraientzako diseinatutako jokoetan parte hartu ahal izango dute. Jabier Azpitarte Berrizko alkateak jakitera eman duenez, “zonalde honetatik Durangaldeko ikuspegi bikaina izango dugu”. Garbikerrek hurrengo 30 urtean lurrak berreskuratzeko ardura izango duenez, zerbitzu bidea izango du. “Ibilbide hori bizikletentzako bidegorri legez aprobetxatuko dugu”, gaineratu du Azpitartek. San Juanak inguru honetan ospatzen direnez, proiektu honetan suak pizteko leku berezi bat izatea ere aurreikusi dute.

Aldundiaren diru-laguntza

Kirol egiturak eraikitzeko Udalak Aldundiagaz hitzarmena sinatu du. Bizkaia 21 planaren barruan 300.000 euroko diru-laguntza jasoko du. Proiektua gauzatzeko Udalak 150.000 euro bideratuko ditu. “Zabortegia urbanizatuta, gainerako lanak 2009an zehar egitea itxaroten dugu”, dio alkateak.