Espainiako Superprestigio Massi Openeko seigarren eta azken proba Berrizen jokatuko da uztailaren 5ean, domekan. Iaz ere Berrizen eman zitzaion amaiera Openari, erreka ondoan osatutako ibilbidearekin. Aurtengo aldian belodromo ingurura tokialdatu dute zirkuitua, espazio gehiago dagoelako eta ikusleek ikuspegi hobea izango dutelako Berrizen lehiatuko diren goi mailako txirrindulariekin gozatzeko.
Irteera puntuan 200 txirrindulari egongo dira, 14 kategoriatan banatuta. Kopuru hori iazkoaren bikoitza da. Elite mailan, gizonetan zein emakumeetan, erabakita daude txapeldunak: Sergio Mantecón eta Marga Fullana. Lehenengoak bost probatik lau irabazi baditu, Fullanak –gaur egungo munduko txapeldunak– bostak irabazi ditu.
Bigarren eta hirugarren postuetarako lehia, ordea, zabal-zabalik dago. Gizonetan Carlos Coloma eta Marc Trayter-ek podiuma defendatuko dute. Bestalde, Iñaki Lejarreta berriztarra hamargarren dago, eta saiatuko da herritarren animopean ahalik aurreren amaitzen. Emakumeen arteko lehia ezin estuago dago; Cristina Mascarra eta Ana Villar bigarren eta hirugarren sailkatuen artean puntu biko aldea bakarrik dago. Gainerako kategoria guztiak oraindik erabakitzeko daude.
Zirkuitu egokiagoaAurten zirkuitu berria estreinatuko dute Berrizen. Sei kilometro dituen ibilbidea belodromo inguruan egokitu dute. Batetik, antolakuntza lanak erraztuko ditu eta, bestetik, ikusleek zirkuituaren zati zabalagoan jarraitu ahalko dituzte txirrindularien ibilerak.
Zirkuituak hiru zati ditu: lehenengoa nahiko teknikoa da, baso an barrena egin beharrekoa; bigarrenak aldapa gogorrak ditu; azkena, belodromo inguruan osatuko dute. Iazko ibilbidea fisikoki gogorragoa zen eta aurtengoa teknikoki zailagoa da.
