ERALDAKETA
TAO txartel berezia, gremio zein osasun zerbitzuentzako
Durango - 2009ko uztailaren 01a, 12:11
Trafikoaren eta aparkamenduaren ordenamenduak (TAO) zenbait eraldaketa “garrantzitsu” jasoko ditu. Horretara, gremioentzat —bertan jardunez gero— eta etxez etxeko laguntzan diharduten osasun-langileentzako txartel berezia sortuko dute, TAO gunean aparkatzeko erraztasunak emanez. Minusbaliatu txarteldunek ere izango dute autoa bertan uztea.EB-Berdeek, PPk, PSE-EEk eta EAJk egin dute alde. Talde Mistoak “gabezia eta akatsak konpondu” arren, kontra egin du eredu horri egokia ez iritzita.
Aralar abstenitu egin da, eta ez da onartu Zumalakarregi eta San Agustinalde txandakatze handiko gune izendatzea —tramite edo erosketetara bideratzeko, aparkamendua ordu bira mugatuz— eskatzen zuen boto partikularra.
Ia gertu dagoen mugikortasun plana arrazoitu dute PPk eta EAJk. Ezetz esan du Talde Mistoak ere, eta EB-Berdeak eta PSE-EE abstenitu egin dira; neurriaren kontra egon ez arren, “alternatiba falta” dela diote sozialistek.
Laranjak urdinduta
Epe labur-ertainean “neurri sakonagoak” bideratzeko tresnatzat dauka Udalak Mugikortasun Plana. Baina, bitartean, “koherentzia emateko” eraldaketa onartu dute: Txatxiena, San Ignazio, Zabale eta Askatasun Etorbidean zabalduko da gune urdina, eta egoiliarrei mugatutako gune laranja batzuk urdindu: Juan Mari Altuna, Dario Regoyos, Saibigain eta Laubideta eta Montebideo kaleetan zati bana.
EB-Berdeen ustez, “hobekuntzak” ekarriko ditu disuasio-aparkalekuak egin arte “nahikoa” deritzoten handitzeak. Aralarrek, berriz, horrek aurretik eta “irizpide ekonomizistei jarraituz”, hasieran onartu zen handitze harekin zerikusirik ez daukala nabarmendu du. Dena dela, bestelako neurrien “premia” gogoratu du.
PPk dio TAOa jarri zenetik “hainbat gabezia” agertu dela, eta PSE-EEk “gutxieneko akordioa” aurretik ez lotzea “ulertezintzat” jo du. Neurri “oso onuragarrion” atzean egon den “eztabaida sakon eta zabala” aitatu du EAJk.
