Garai.  Lehenengo biderrez liberatuta egongo da, lanaldi partzialean, Garaiko alkatea. Izan ere, udal jardunerako dedikazio partziala izatea onartu du udalbatzarrak, aho batez. Gontzal Sarrigoitia alkateak berak azaldu lez, astean 12 orduan egongo da denbora partzialeko arduraldian, 2009ko urtarrilaren 1etik aurrera.

Garai.  Datorren urtean %4 igoko dituzte zergak eta tasak, oro har. Hala onartu du udalbatzarrak. Salbuespenak ere badira; batetik, zaborraren gaineko tasa, aurten ere, %10 igoko dute, eta, bestetik, ura, estolderia eta putzuak garbitzeko zerbitzuaren gainekoa, %6 igoko dute.

Garai.  Indarrean direnak “zaharkituta” daudela-eta, Arau Subsidiario berriak lantzeko prozesua hasi gura du EAJk, eta, horretarako, 2009ko aurrekontuan hiri-plangintza idazteko taldea kontratatzeko dirua gordetzea proposatuko du, ekarpenak egin gura dituzten guztiei zabaldutako batzordea sortzea ez eze.

Garai.  Garaiko Momoitioko San Juan auzoan bizileku bakarreko etxebizitza bateko teilatua konpontzen ziharduela istripua izan zuen behargin batek astelehenean. Bost metroko altueratik jausi zen Zaldibarren bizi den 29 urteko behargina, larri zaurituz.