Iurretakok zazpi garaipen daramatza eta euretariko hiru azken hiru jardunaldietan heldu dira. Uritarra (1-0), San Pedro (1-2) eta Arratia (0-1) mendean hartuta, Ohorezko Mailako jaitsiera postutik irten da bost jardunaldi falta direnean liga amaitzeko.
Aipatzekoa da Adrian Tejedaren ekarpena. Otsailean batu zen Iurretakora, Ondarroako Aurrera taldetik, eta bereak izan ziren Uritarraren eta Arratiaren kontrako garaipeneko golak. San Pedroren kontra, taldeak nortasun handia erakutsi zuen. Atzetik hasi eta irabazteko kapaz izan zen Asier Santosen eta taldeko golegile nagusia den Jon Filippiniren golei eskerrak.